Hlutabréf í GoPro Inc féllu um tæplega 10% í dag í kjölfar þess að franskur blaðamaður sagði að ökuþórinn Michael Schumacher hefði hlotið alvarlega höfuðáverka vegna GoPro-myndavélar sem hann var með á höfðinu. Schumacher datt á skíðum í Ölpunum fyrir tæpu ári. Hann slasaðist lífshættulega. Fram hefur komið að hann hafi slegið höfðinu utan í stein í fallinu.

„Áverkar Michaels voru ekki vegna höggsins, heldur vegna GoPro-myndavélar sem hann var með á höfðinu. Hún skaðaði heila hans,“ sagði franski blaðamaðurinn Jean-Louis Moncet í viðtali á útvarpsstöðinni Europe 1 um helgina.

Fréttir hermdu að Moncet hefði talað við son Schumachers, Mick, en hann bar það sjálfur til baka í færslu á Twitter.

Schumacher slasaðist lífshættulega í frönsku Ölpunum 29. desember í fyrra. Honum var haldið sofandi þar til í júní. Hann fær nú hjúkrun á heimili sínu.

Talsmaður fyrirtækisins GoPro segir að verið sé að afla gagna um málið og nú sé staðfest að upplýsingarnar um áverkana hafi ekki komið frá fjölskyldumeðlimi.

Hlutabréf í fyrirtækinu lækkuðu mikið í viðskiptum í dag. Mest lækkuðu þau um 16% en þegar mörkuðum var lokað var niðurstaðan sú að þau lækkuðu um 9,8%.

GoPro fór á markað í lok júní og hefur verðmæti fyrirtækisins þrefaldast síðan þá. Hlutabréf í öðrum sambærilegum fyrirtækjum lækkuðu einnig í dag.

Tengdar fréttir

Schumacher

Schumacher á sjúkrahúsi í París

• Schumacher 50 ára — ástandið enn óljóst
• Schumacher enn að berjast
• Schumacher sagður á förum vestur
• Ástand Schumacher áfram óljóst

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Það er lítið sem hundstungan finnur ekki.