Samskip vísar á bug ásökunum um samkeppnisbrot sem fram komu í umfjöllun RÚV í gær. „Fyrir liggur að Samkeppniseftirlitið ákvað í september 2013 að hefja rannsókn á Samskipum en engar niðurstöður liggja fyrir úr þeirri athugun,“ segir í tilkynningu frá Samskip um málið.
„Samkvæmt umfjöllun RÚV sendi Samkeppniseftirlitið málið til meðferðar hjá sérstökum saksóknara í mars síðastliðnum. Félaginu er ekki kunnugt um að ákvörðun hafi verið tekin um rannsókn málsins þar og engin ákæra hefur verið gefin út hvorki á hendur forstjóra félagsins né öðrum starfsmönnum þess.
Í þessu ljósi telja Samskip ekki rétt að tjá sig frekar um málið.“