Áhrif VSK-breytinga lítil sem engin

Vandasamt er að áætla nákvæmlega hver áhrif af skattbreytingum fjárlagafrumvarpsins verða og hvenær þau koma fram en undanfarið hafa þó lækkanir að hluta til komið fram á heimilistækjum, raftækjum og byggingarvörum „en við gerum ráð fyrir að áhrifin komi að mestu leyti fram í janúar,“ segir í markaðspunktum Greiningardeildar Arion banka.

„Greining okkar á heildaráhrifum frumvarpsins bendir til þess að áhrifin verði ekki ósvipuð því sem kom fram í fjárlagafrumvarpinu að því gefnu að breytingarnar skili sér að fullu út í verðlag,“ segir þar. Þá er gert ráð fyrir nokkrum hækkunum á matarkörfunni og á hótelum og veitingastöðum vegna hækkunar á neðra virðisaukaskattsþrepinu. Á móti vegur þó að lækkun á efra virðisaukaskattsþrepinu dreifist á flesta aðra undirliði vísitölu neysluverðs. „Einnig áætlum við að áhrif af afnámi vörugjalda komi að fullu í gegn. Áhrifin á verðlag í janúar verða því lítil þegar allt er lagt saman,“ segir Greiningardeildin.

Tólf mánuði undir markmiði

Í bráðabirgðaspá Greiningardeildar til næstu þriggja mánaða er gert ráð fyrir að eldsneytisverð standi í stað og að gengi krónunnar haldist stöðugt. Gert er ráð fyrir lágri verðbólgu næstu mánuði og að hún standi í 2,0% í janúar á næsta ári. Gangi spáin eftir yrði janúar tólfti mánuðurinn í röð þar sem verðbólgan hefur verið undir verðbólgumarkmiði Seðlabankans.

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK