Viðskipti | mbl | 4.2.2015 | 9:04

Stofna 4 milljarða framtakssjóð

Landsbréf.

Landsbréf og SA Framtak GP hafa stofnað nýjan 4 milljarða framtakssjóð sem mun fjárfesta í íslenskum sprota- og vaxtarfyrirtækjum. Sjóðurinn kallast Brunnur vaxtarsjóður slhf., og er ætlað að fjárfesta í íslenskum sprota- og vaxtarfyrirtækjum.

Hann verður rekinn verður í formi samlagshlutafélags og hluthafar í sjóðnum eru Landsbankinn, sjö lífeyrissjóðir, nokkrir einkafjárfestar, auk SA Framtaks GP sem er jafnframt ábyrgðaraðili samlagshlutafélagsins. Landsbréf munu annast rekstur sjóðsins í samstarfi við SA Framtak GP. Sjóðstjórar sjóðsins eru þeir Helgi Júlíusson frá Landsbréfum ásamt Sigurði Arnljótssyni og Árna Blöndal frá SA Framtaki GP.

100 - 500 milljóna framlag

Sjóðurinn mun á næstu þremur til fimm árum fjárfesta í íslenskum sprota- og vaxtarfyrirtækjum og lögð verður áhersla á gjaldeyrisskapandi fyrirtæki sem hafa burði til þess að vaxa og auka tekjur sínar hratt án þess að kostnaður hækki að sama skapi. Þær atvinnugreinar sem einkum verður horft til eru: hugbúnaður, veflausnir, afþreyingariðnaður, hátækni, líftækni, orkuiðnaður, sjávarútvegstækni og matvælaframleiðsla. Áhersla verður lögð á að fyrirtækin búi yfir samkeppnisforskoti í formi þekkingar, einkaleyfis eða viðskiptahugmyndar og að frumkvöðlateymið sé framúrskarandi á sínu sviði. Áætlað er sjóðurinn muni fjárfesta í 10 til 15 fyrirtækjum og að hver fjárfesting verði á bilinu 100 til 500 milljónir króna. Gert er ráð fyrir að sjóðurinn verði í flestum tilvikum leiðandi fjárfestir og að fulltrúar hans muni setjast í stjórn þeirra fyrirtækja sem fjárfest verður í.

Aukinn áhugi fjárfesta

„Við sjáum mörg tækifæri í íslenskum sprota- og vaxtarfyrirtækjum. Það á m.a. rætur að rekja til þess að hér er mikið framboð af spennandi fjárfestingakostum en lítið hefur verið um fjármagn,“ er haft eftir Árna Blöndal, hjá SA Framtaki GP, í tilkynningu.

„Stofnun sjóðsins er ánægjuleg vísbending um aukinn áhuga fjárfesta á nýsköpun og þeim tækifærum sem felast í því að auka fjölbreytni í íslensku atvinnulífi. Við þökkum hluthöfum Brunns það traust sem þeir sýna okkur með áskriftarloforðum í sjóðinn. Mikill undirbúningur liggur að baki verkefninu og við höfum átt gott samstarf við starfsmenn SA Framtaks um stofnun sjóðsins,“ er jafnframt haft eftir Helga Þór Arasyni, framkvæmdastjóra Landsbréfa.