Ólafur Örn Nielsen hefur verið ráðinn framkvæmdastjóri Kolibri. Hann tekur við starfinu af Pétri Orra Sæmundsen sem verður stjórnarformaður. Ólafur hefur verið sölu- og markaðsstjóri Kolibri frá árinu 2014 en fyrirtækið sérhæfir sig í að hjálpa stærri fyrirtækjum að þróa hugbúnaðarlausnir.
Ólafur hefur starfað við stafræna vöruþróun í rúman áratug, m.a. sem framkvæmdastjóri Form5 og vefmarkaðsstjóri hjá WOW air. Þar áður starfaði hann m.a. við vöruþróun hjá mbl.is. Þá situr Ólafur í stjórn ÍMARK, félags markaðsfólks á Íslandi.
Í tilkynningu er haft eftir Ólafi að síðasta ár hafi verið metár í rekstri félagsins og að gaman verði að fylgja eftir stærri og flóknari verkefnum þar sem þjónustan hafi verið í mjög örri þróun.
Kjarnaþjónusta Kolibri eru þverfagleg teymi með hönnuðum, forriturum og teymisþjálfurum sem þróa vörur og hugbúnaðarlausnir en um tuttugu hugbúnaðarsérfræðingar og hönnuðir starfa hjá fyritækinu.
Á meðal dótturfélaga Kolibri eru Agile Ísland ehf. og Lean Ísland ehf. Heildarvelta fyrirtækjanna var 334 milljónir króna árið 2014. Viðskiptavinir Kolibri eru m.a. Íslandsbanki, Tryggingamiðstöðin og Landsnet.