Tafir kostuðu 2,5 milljarða

Ríkissjóður fær ekki bættan 2.427 milljóna vaxtakostnað sem féll á hann í tengslum við stofnun Arion banka.

Ástæðuna segir fjármála- og efnahagsráðuneytið vera þá að það hafi tekið Fjármálaeftirlitið langan tíma að veita Kaupskilum, félagi sem að fullu er í eigu slitabús Kaupþings, heimild til að fara með ráðandi eignarhlut í Arion banka, að því er fram kemur í ViðskiptaMogganum í dag.

Þetta kemur fram í svari ráðuneytisins við fyrirspurn sem Morgunblaðið sendi því. Þar var leitað svara við því af hverju hluti þess vaxtakostnaðar sem ríkið hafði lagt út fyrir vegna stofnunar Arion banka og Íslandsbanka fékkst ekki greiddur af Kaupþingi og Glitni þegar samið var um að slitabúin eignuðust ráðandi hluti í bönkunum tveimur.