Gjaldþrotaskiptum á enn öðru dótturfélagi VBS fjárfestingabanka er lokið. Kröfurnar námu alls rúmum milljarði króna og fengust tólf milljónir greiddar þar upp í.
Þetta kemur fram í Lögbirtingarblaðinu í dag en félagið var úrskurðað gjaldþrota í mars 2015.
Þetta er eitt af nokkrum dótturfélögum VBS sem voru í fasteignarekstri. Í lok desember lauk skiptum á HK Húseignum ehf. Lýstar kröfur námu tæpum þremur milljörðum króna og upp í þær fékkst engin greiðsla.
Önnur félög eru Skíri ehf., VBS fasteignir ehf., RA eignir ehf., Stórás ehf. og Framtíðarleigu ehf. Samanlagt þrot þeirra félaga nemur hátt í tíu milljörðum króna.
VBS eignasafn ehf., sem áður hét VBS fjárfestingarbanki hf., hefur verið í slitameðferð frá árinu 2010. Í samtali við Viðskiptablaðið á dögunum sagði Hróbjartur Jónatansson, formaður slitastjórnar VBS, að ennþá ætti eftir að útkljá ágreining um nokkrar kröfur.
Samkvæmt honum nema lýstar kröfur í búið alls um 50 milljörðum króna og talið er að endurheimtur verði á bilinu 13 til 15 prósent. Skiptum verður líklega lokið í vor.