Verið er að leggja lokahönd á frumvarp til breytinga á skattalögum sem byggir á ábendingum frá Skattrannsóknarstjóra og Ríkisskattstjóra. Þetta eru breytingar sem fjármálaráðherra telur rétt að ráðast í án frekari tafa og varða meðal annars aflandsfélög.

Í samtali við mbl í síðustu viku sagðist Skúli Eggert Þórðarson, ríkisskattstjóri, hafa sent ítarlegar tillögur til fjár­málaráðuneyt­is­ins um laga­breyt­ing­ar vegna af­l­ands­fé­laga og skattaund­an­skota. Sagði hann lagafrumvarp þess efnis væntanlegt fljótlega.

Frétt mbl.is: Ítarlegar tillögur vegna aflandsfélaga

Lagt fram síðar í vikunni

Aðspurður um stöðu málsins segir Bjarni Benediktsson, fjármálaráðherra að verið sé að leggja lokahönd á frumvarpið í ráðuneytinu og vonast hann til þess að hægt verði að leggja það fyrir ríkisstjórn síðar í vikunni.

Bjarni segir að ábendingum hafi verið safnað frá nokkrum stofnunum og nefnir þar sérstaklega Skattrannsóknarstjóra og Ríkisskattstjóra. 

Auk þess sem þetta frumvarp, sem felur í sér breytingar sem Bjarni telur rétt að ráðast í án frekari tafa, er verið að setja saman starfshóp sem á að horfa enn víðar yfir sviðið og skila af sér frekari ráðgjöf varðandi efnið. Hóp­ur­inn á að skila skýrslu um til­lög­ur fyr­ir lok júní.

Frétt mbl.is: Skipa starfshóp um skattaundanskot og skattaskjól

Bjarni vill þó ekki gefa efni frumvarpsins upp nánar að svo stöddu.

Herða ákvæði tekjuskattslaga

Aðspurður hvort frumvarpið feli í sér breytingar á tekjuskattslögum segir hann að verið sé að skoða hvort ástæða sé til að herða ákvæði þeirra laga og eftir atvikum ákvæði annarra laga.

Líkt og áður segir varða breytingarnar aflandsfélög en Bjarni segist ekki útiloka að á sama tíma verði gerðar breytingar sem ekki tengjast aflandsfélögum eða slíkri starfsemi með beinum hætti.

Upplýsingaskortur meginvandinn

Á fundi efnahags- og viðskiptanefndar á dögunum sagði Skúli Eggert Þórðarson, ríkisskattstjóri, meðal annars að leyndin við mál sem tengjast skattaskjólum væri meginvandinn. Það sem máli skipti fyr­ir skattyf­ir­völd væri að fá upp­lýs­ing­ar en þær fást sjaldnast nema með áhlaup­um eða sam­bæri­leg­um aðgerðum.

Frétt mbl.is: Verið hrópandinn í eyðimörkinni

Bryndís Kristjánsdóttir, skattrannsóknarstjóri, hefur einnig gert upplýsingaskortinn að umtalsefni og sagði á dögunum að aðgangur skattyfirvalda að upplýsingum skipti öllu máli. Sagði hún völd gjaldanda við skattskoðun vera umhugsunarverð. Hann hafi mikla stjórn á gögn­un­um sem ákveðið er að leggja fram.

Sagðist Bryndís telja rétt að skoða laga­breyt­ing­ar þar sem gjald­andi yrði mögu­lega lát­inn bera hall­ann af því að leggja ekki fram nauðsyn­leg gögn með rýmri heim­ild­um til áætl­un­ar tekna eða að viður­lög­um yrði beitt með harðari hætti.

Frétt mbl.is: Tekjurnar sjaldnast taldar fram

Ráðgjöf refsiverð?

Þá sagði Bryndís einnig á fundi efnahags- og viðskiptanefndar á dögunum að skoða mætti hvort gera ætti ráðgjöf um að skrá fé­lög í skatta­skjóli refsi­verða. Það yrði þá til að mynda á þeim for­send­um að ráðgjafarnir væru meðsek­ir í mögu­leg­um brot­um. 

Frétt mbl.is: Ráðgjöf ætti að vera refsiverð