Áströlsk stjórnvöld hafa í hyggju að selja rafeyrinn bitcoin, sem lögreglan þar í landi hefur lagt hald á, að verðmæti átta milljónir sterlingspunda sem jafngildir 1,5 milljörðum íslenskra króna.

Rafeyririnn verður seldur hæstbjóðanda á uppboði í næsta mánuði. Endurskoðunarfyrirtækið Ernst & Young mun hafa veg og vanda af uppboðinu.

Um er að ræða 24.518 einingar af rafeyrinum. Í tilkynningu frá uppboðshaldara kom fram að lögreglan hafi lagt hald á rafeyrinn í tengslum við glæparannsókn.

Sérfræðingar segja að stjórnvöld hafi valið góðan tíma til þess að selja einingarnar.

Fram kemur í áströlskum fjölmiðlum að lögreglan hafi lagt hald á 24.500 bitcoin-einingar í Victoriu árið 2013, í kjölfar handtöku manns sem er grunaður um að hafa verslað með ólögleg eiturlyf á netinu.

Lögreglan staðfesti þessar fregnir á síðasta ári.

„Þetta er töluvert magn af bitcoin,“ segir dr. Garrick Hileman, sagnfræðingur hjá Cambridge Centre for Alternative Finance, í samtali við breska ríkisútvarpið. Verðmæti þeirra sé gríðarlegt.

Um fjögur þúsund nýjar bitcoin-einingar koma á markað á dag um þessar mundir. Talið er að sala á tíu þúsund einingum hafi mikil áhrif á markaðsverð rafeyrisins.

Verð á bitcoin er nú 530 Bandaríkjadalir og hefur ekki verið svo hátt frá því í ágúst 2014.

Hileman segir að áströlsk stjórnvöld hafi valið „öruggan“ tíma til þess að selja rafeyrinn því það væri nokkur óvissa um hvert verðmæti bitcoin yrði í júlí.

Um er að ræða fyrsta uppboðið á bitcoin sem fram fer fyrir utan Bandaríkin. Hver sem er getur tekið þátt og lagt inn tilboð.

Frétt BBC

Tengdar fréttir

Rafmynt

Hlýtur 11 þúsund ára fangelsisdóm

• Sektuð fyrir að greina ekki frá launuðum auglýsingum
• Tækifæri myndast á markaði
• Loka á eina stærstu rafmyntakauphöll heims
• Ímynd Musk notuð til þess að blekkja grunlausa

» Fleiri tengdar fréttir

• Blogga um frétt