Munu minnka framleiðsluna um 558.000 tunnur

Ellefu olíuframleiðsluríki, sem eru ekki aðilar að Opec, samtökum olíuframleiðsluríkja, hafa samþykkt að feta í fótspor Opec-ríkjanna og minnka olíuframleiðslu sína til þess að ýta undir olíuverð.

BBC greinir frá þessu.

Ríkin greindu frá því í gær að þau myndu minnka framleiðsluna um 558.000 tunnur á dag.

Fyrri frétt mbl.is: Óvissa um áhrif olíusamkomulags

Opec greindi frá því í síðasta mánuði að aðildarríkin myndu minnka olíuframleiðslu og er þetta í fyrsta skiptið í fimmtán ár sem samkomulag næst milli ríkjanna um framleiðslu.

Opec-ríkin segjast ætla að minnka framleiðsluna um 1,2 milljónir tunna á dag og hefst það fyrirkomulag í janúar.

Meðal þeirra ríkja sem eru eru ekki í Opec eru Rússland, Azerbaijan, Oman, Mexíkó, Malasía, Súdan, Suður-Súdan og Bahrain.

Opec-ríkin munu funda næst 25. maí til þess að fara yfir hvernig framleiðslan gangi undir nýju fyrirkomulagi.

• Blogga um frétt