Enginn gerði fyrirvara við útboðið

mbl.is/Ómar

Samkvæmt upplýsingum frá Seðlabanka Íslands gengust fjármagnseigendur sem tóku þátt í síðasta aflandskrónuútboði undir skilmála þess og voru engir fyrirvarar gerðir við það. 

Í aflandskrónuútboðinu sem fór fram 16. júní bauðst bankinn til að kaupa aflandskrónueignir á genginu 190 krónur á evru. Almennt gengi evru á þeim tíma var um 140 krónur. Alls bárust 1.715 tilboð og var 1.688 tilboðum tekið eða 98,4%. Niðurstaðan varð sú að Seðlabankinn greiddi andvirði 47 milljarða króna í gjaldeyri fyrir 72 milljarða aflandskróna.

Heildarupphæð aflandskróna nam þá rúmum 300 milljörðum króna og losnaði því alls ekki um þær allar í útboðinu. Stórir sjóðir sátu hjá og töldu aðgerðirnar brjóta gegn stjórnarskrárvörðum rétti þeirra.

Samhliða almennri afléttingu hafta hefur ríkið samið við þá sem eftir sátu um að kaupa evrur á genginu 137,5.

Í Fréttablaðinu í dag er haft eftir Helga Pétri Magnússyni lögmanni sem unnið hefur fyrir krónueigendur að til standi að athuga hvort einhverjir sem tekið hafi þátt í útboðinu hafi gert fyrirvara við það. Gætu þeir samkvæmt því átt kröfu á ríkissjóð.

Stefán Jóhann Stefánsson, upplýsingafulltrúi Seðlabankans, segir skilmála útboðsins hafa verið opinbera og skýra. Allir sem tóku þátt hafi gengist undir þá og voru engir fyrirvarar gerðir.

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK