57 milljarða fjárfesting

Stöðugur uppgangur hefur verið á Austfjörðum undanfarin ár og nemur heildarfjárfesting í helstu atvinnuvegum Austfjarða um 57 milljörðum króna síðastliðin fimm ár.

Sjávarútvegsfyrirtækin hafa fjárfest mest, en samanlögð heildarfjárfesting Síldarvinnslunnar, Loðnuvinnslunnar og Eskju í Fjarðabyggð nemur rúmum 48 milljörðum undanfarin fimm ár. Þessu til viðbótar má nefna að frá aldamótum hafa HB Grandi og Skinney-Þinganes lagt fjármagn í mikla uppbyggingu á Vopnafirði og Höfn í Hornafirði.

Alcoa Fjarðaál hefur síðustu fimm ár fjárfest fyrir rúma 6,5 milljarða á Reyðarfirði og áætlar fjárfestingu fyrir rúman milljarð í ár. Þá hefur laxeldisfyrirtækið Laxar nú þegar fjárfest fyrir um 700 milljónir króna í uppbyggingu á starfsemi sinni á Austfjörðum og áformar að heildarfjárfesting sín muni nema um þremur milljörðum króna áður en fyrstu tekjur koma, að því er fram kemur í fréttaskýringu um fjárfestingar þessar í Morgunblaðinu í dag.