Banna erlenda íbúðakaupendur

Stjórnvöld í Nýja Sjálandi hafa tekið upp á því að banna útlendingum að kaupa þær íbúðir sem eru til staðar í landinu í því skyni að stemma stigu við hækkandi húsnæðisverð. 

Jacinda Ardern forsætisráðherra segir að bannið gildi aðeins um þá sem ekki eru búsettir í landinu að því er kemur fram í frétt breska ríkisútvarpsins BBC. 

Lágt vaxtastig, framboðsskortur og fólksflutningar til landsins hafa keyrt húsnæðisverð á Nýja Sjálandi upp á síðustu árum og var erlent eignarhald á íbúðum hitamál í aðdraganda kosninganna í september. Hafa Kínverjar verið umsvifamestir á fasteignamarkaðinum í landinu. 

„Við höfum ákveðið að banna kaup útlendinga á þeim íbúðum sem eru til staðar,“ sagði Ardern í gær, og lofaði hún einnig að draga úr fólksflutningum til landsins og einblína á að ná atvinnuleysi niður. 

Nýlega var haft eftir forsætisráðherranum að kapíalismi hefði „augjóslega misheppnast“ þegar kæmi að því að útvega fátækum húsnæði.

• Blogga um frétt