„Við einblínum á mannlega þáttinn í gagnaöryggi. Það er jafnsatt í dag og þegar ég byrjaði fyrir 14 árum síðan að fólkið er veikast hlekkurinn,“ segir Ragnar Sigurðsson, stofnandi AwareGO, sem framleiðir og selur myndskeið fyrir þjálfun í tölvuöryggi.
Fyrirtækið var stofnað árið 2007 en Ragnar hafði um nokkurt skeið unnið við kennslu í upplýsingatækni. „Ég hélt fyrirlestra um tölvuöryggi í fyrirtækjum og notaðist við Power Point-glærur. Þegar ég sá hvernig lífsviljinn sogaðist úr fólki fór ég að hugsa hvort að ekki væri til betri leið.“
Fyrsta myndskeiðið var tekið upp sama ár, 2007, og fyrstu 12 þættirnir, hver 6-8 mínútur að lengd, urðu til skömmu síðar eða árið 2008. Þeir hittu ekki í mark, meðal annars vegna lengdarinnar að sögn Ragnars. Þá trufluðu menningarlegir þættir söluna í Bandaríkjunum.
„Í Bandaríkjunum náðum við ekki einni einustu sölu því lögfræðideildirnar stöðvuðu þetta á þeim grundvelli að allir leikararnir væru hvítir. Þetta eru hlutir sem maður hugsar ekki um á Íslandi,“ segir Ragnar. „Síðan lentum við í því að yfirmaður kom í veg fyrir sölu því einn leikarinn uppfyllti ekki snyrtireglur fyrirtækisins. Það mátti vera vel rakaður eða með skegg en ekki órakaður og við þurftum því að taka aftur upp þetta eina myndband.“
Eftir að hafa þróað efnið og klippt eldra efnið töluvert niður var ákveðið að ráðast í nýja framleiðslu árið 2014. Búið er að framleiða 24 myndbönd og fyrirtækjum seld 12 mánaða áskrift.
„Það er búið að pakka öllu þessu efni í eina mínútu þannig að skilaboðin sitji í áhorfandanum og það eru heilmikil fræði á bak við það. Þetta er eins og með bílbeltaauglýsingar. Fólk veit að þá að á að setja á sig belti en samt þarf að auglýsa það á áhrifamikinn hátt til þess að fleiri taki upp á því.“
Í dag er AwareGO orðið alþjóðlegt fyrirtæki á sviði öryggisvitundar með viðskiptavini út um allan heim. Á Íslandi hafa yfir 21.000 manns notað efnið úr smiðju fyrirtækisins og yfir 850.000 manns á heimsvísu. Meðal viðskiptavina eru Barclays-banki, Credit Suisse og ríkisfyrirtæki á vegum Oregon-sýslu í Bandaríkjunum auk helstu fyrirtækja og stofnana á Íslandi.
Um mitt ár 2018 verður innleidd Evrópulöggjöf sem nefnist „General Data Protection Regulation“. Löggjöfin hefur í för með sér að fyrirtæki í Evrópu þurfa að ráða samtals 27 þúsund persónuverndarfulltrúa en fari þau ekki eftir settum reglum geta þau verið sektuð um allt að 4% af veltu. Þetta skapar gríðarmikil tækifæri fyrir AwareGO.
„Ég held að við séum vel í stakk búnir til að grípa tækifærið. Persónuverndarfulltrúarnir sjá um að þjálfa alla starfsmenn sem hafa aðgang að þessum persónuupplýsingum og við erum með vöruna sem þeir þurfa að nota. Ég hef orðað það þannig að við séum með frábært leikrit og nú þurfum við bara að fara að sýna það. “
AwareGO undirritaði á dögunum samningin við Reykjavíkurborg um keyrslu á efni til þúsunda starfsmanna borgarinnar en borgin, eins og aðrar stofnanir og fyrirtæki, hefur hafið undirbúning til að uppfylla skilyrði um gagnaöryggi. Ragnar segir að öryggisvitund starfsfólks sé eitt af því mikilvægasta í reglugerðinni því það sé orðið almennt viðurkennt að vírusvarnir og eldveggir haldi ekki lengur ein og sér. Mannlega þáttinn verði að styrkja.
Auk þess er AwareGO að þróa nýjan hugbúnað, sem gerir fyrirtækinu kleift að selja beint til lítilla og meðalstórra fyrirtækja um allan heim á netinu með einföldum hætti.
„Við verðum fyrsta fyrirtækið í þessum geira til að þjónusta beint á netinu,“ segir Ragnar. „Aðalmálið í þessu er að við erum með skalanlegt alþjóðlegt efni á mörgum tungumálum sem við getum byrjað að markaðssetja og gríðarlega mörg fyrirtæki vantar vöruna á næstu misserum.“