Mikil tækifæri í Suður-Ameríku

Árni Sigurðsson, framkvæmdastjóri viðskiptaþróunar hjá Marel, bendir á að 370 milljónir manna búi í Bandaríkjunum og Kanada. Sá markaður skili um 30% af tekjum Marels.

„Það búa 630 milljónir í Suður-Ameríku, en sá markaður er einungis 8% af okkar tekjum. Þar sjáum við gríðarleg tækifæri. Sá markaður flytur sömuleiðis út mat og hráefni til fæðuframleiðslu, m.a. til Kína, og í því eru líka fólgin tækifæri.“

Árni vakti athygli á þessu á fyrsta fjárfestadegi fyrirtækisins í Kaupmannahöfn síðastliðinn fimmtudag, en um samkomuna er fjallað í ViðskiptaMogganum í dag. Gestirnir voru 110 og þar af um þriðjungur erlendur, að sögn Árna Odds Þórðarsonar, forstjóra Marels. „Það er býsna gott í ljósi þess að 94% hluthafa félagsins eru innlend. Við höfum fundið fyrir umtalsverðum áhuga frá fjárfestum á að fræðast meira um Marel,“ segir hann.