Töluverð aukning hefur orðið á milli ára í innlendri netverslun í kjölfar „Singles Day“ 11. nóvember sem kenndur er við einhleypa og hefur notið vaxandi vinsælda hér á landi eins og víða um heim. Íslandspóstur hefur tekið saman fjölda sendinga sem bárust í kjölfar dagsins en íslenskar netverslanir tóku þátt í deginum og buðu vörur á afslætti.
„Samkvæmt fyrstu tölum þá hefur orðið töluverð aukning milli ára og heildarfjöldi sendinga aukist um rúm 50% í samanburð við umsvifin þann 11. nóvember í fyrra. Þetta er í takti við vinsældir dagsins á alþjóðavísu, en víðast hvar voru sölumet slegin. Ekki eru birtar heildartölur yfir sölu kínverskra netverslana en sú stærsta þeirra og sú sem ber líklega mesta ábyrgð á því að gera þennan dag að svo stórum tilboðsdegi í netheimum, Aliexpress, segir að salan í gegnum vefsíðu fyrirtækisins á þessum eina degi hafi verið 40% meiri í ár en í fyrra,“ segir í fréttatilkynningu.
Ennfremur segir að Íslandspóstur spái því að sendingar erlendis frá verði orðnar tvöfalt fleiri eftir þrjú ár.