„Mig langar eiginlega að stöðva tímann. Þetta gerðist svo hratt og maður vill ekki að þetta taki enda,“ segir Bryndís Björnsdóttir, starfsmaður hjá Kosti.
Ákveðið hefur verið að loka versluninni Kosti við Dalveg í Kópavogi. Nú stendur yfir rýmingarsala þar sem vörur verða boðnar á allt að helmingsafslætti. Jón Gerald Sullenberger, eigandi verslunarinnar, gaf út að Kostur gæti ekki keppt við Costco, eina stærstu verslunarkeðju í heiminum.
„Við erum einmitt að setja síðustu vörurnar í hillurnar,“ segir Bryndís og bætir við að rýmingarsalan hafi gengið vel hingað til.
Bryndís segir að lokun verslunarinnar sé erfið að því leyti að starfsmannahópurinn hafi verið samheldinn eins og ein stór fjölskylda. Auk þess hafa fréttirnar fengið á marga viðskiptavini.
„Kúnnarnir okkar eru hrikalega sárir yfir þessu. Þeir eru hálfklökkir eins og við og knúsa mann í versluninni,“ segir Bryndís. „Það gerir mann dapran, maður á eftir að sakna þeirra líka.“
Þá segir Bryndís að mikil eftirsjá verði eftir Kosti yfir jólin.
„Það hefur verið hefð hjá mörgum að koma með fjölskylduna fyrir jólin og kaupa alls konar jólavörur og jóladót. Hérna hefur jólastemningin verið og fólk trúir því ekki að versluninni verði lokað fyrir jól.“