Samkvæmt norskum sérfræðingum sem unnu úttekt á verksmiðju United Silicon í Helguvík kostar 25 milljónir evra, 3,1 milljarð íslenskra króna, að klára verksmiðjuna og koma mengunarvörnum í lag.
RÚV greindi fyrst frá málinu. Um sextíu manns eru að störfum hjá verksmiðjunni en frá því framleiðsla var stöðvuð í byrjun september hefur starfsfólkið meðal annars sinnt viðhaldi og tíminn verið nýttur í að styrkja það í störfum.
Félagið hefur verið í greiðslustöðvun frá 14. ágúst en Héraðsdómur Reykjaness samþykkti í byrjun desember beiðni kröfuhafa United Silicon um að heimild til greiðslustöðvunar yrði framlengd til 22. janúar.
Norska ráðgjafafyrirtækið Multiconsult rannsakaði tækjabúnaðinn. Karen Kjartansdóttir, upplýsingafulltrúi United Silicon, sagði í samtali við mbl.is að niðurstaða þeirra hefði leitt í ljós að það kostaði 5 milljónir evra, 627 milljónir íslenskra króna, að bæta úr ýmsum málum.
Hins vegar þyrfti að bæta við 20 milljónum evra til að allt verði eins og best getur. Hún sagði einnig að niðurstaða Norðmannanna hefði verið á þá leið að grunnhönnun ofnsins væri virkilega vönduð. Hins vegar hefði ýmis jaðarbúnaður valdið tíðum bilunum og það væri meginorsök lyktarmengunar á svæðinu.