Gistinætur á hótelum í nóvember síðastliðnum voru 304.000, sem er sami fjöldi og í nóvember í fyrra. Þegar aðeins er litið á fjölda gistinátta sem skráðar voru á erlenda ferðamenn fækkaði þeim um 1% milli ára. Heilt á litið er fækkun á höfuðborgarsvæðinu en fjölgun á landsbyggðinni. Gistinóttum Íslendinga fjölgaði hins vegar um 7%. Þetta kemur fram í nýjum tölum Hagstofunnar.
Um 69% allra gistinátta voru á höfuðborgarsvæðinu eða 210.000, sem er 4% fækkun frá fyrra ári. Nokkur fjölgun varð á gistinóttum frá nóvember fyrra árs á Norðurlandi (15%), Suðurnesjum (12%) og Suðurlandi (10%).
Um 89% gistinátta voru skráðar á erlenda ferðamenn, en erlendum gistinóttum fækkaði um 1% frá nóvember í fyrra meðan gistinóttum Íslendinga fjölgaði um 7%. Bretar gistu flestar nætur (86.500), síðan Bandaríkjamenn (74.900) og Þjóðverjar (11.900), en gistinætur Íslendinga voru 33.800.
Á tólf mánaða tímabili, frá desember 2016 til nóvember 2017, var heildarfjöldi gistinátta á hótelum um 4.251.000 sem er 13% aukning miðað við sama tímabil árið áður.
Herbergjanýting í nóvember 2017 var 62,9%, sem er lækkun um 5,0 prósentustig frá nóvember 2016 þegar hún var 67,9%. Á sama tíma hefur framboð gistirýmis aukist um 5,1% mælt í fjölda herbergja. Nýtingin var best á höfuðborgarsvæðinu, eða 80,5%.
Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.