Facebook fer í sjálfsskoðun

Mark Zuckerberg, forstjóri Facebook, sagði í gær að markmið hans fyrir 2018 væri að treysta grunn fyrirtækisins. 

Áður hefur Zuckerberg einungis strengt áramótaheit sem snúa að honum sjálfum, að því er kemur fram í frétt Reuters. 

„Heimurinn er kvíðinn og sundraður og Facebook á mikið verk fyrir höndum,“ skrifar Zuckerberg í færslu á Facebook. Hann lýsir því þannig að Facebook standi á krossgötum sem krefjist aðkomu hans. 

Zuckerberg segir að útbreiðsla hatursorðræðu og áróðurs á samfélagsmiðlum sé vandamál sem þurfi að takast á við. „Áskorunin árið 2018 er að einblína á að koma þessum stóru málum í lag. [...] Við komum ekki í veg fyrir alla misnotkun en eins og staðan er í dag erum við allt of mistæk við að framfylgja reglum.“

Nýlega voru samþykkt lög í Þýskalandi sem gera samfélagsmiðla á borð við Facebook og Twitter ábyrga fyrir því að fjarlægja hatursorðræðu. Ofan á það hafa þingmenn í Bandaríkjunum gagnrýnt Facebook fyrir að hafa ekki komið í veg fyrir að Rússar notfærðu sér samfélagsmiðilinn til þess að hafa áhrif á forsetakosningarnar 2016. 

Þá hafa fyrrverandi stjórnendur hjá Facebook gagnrýnt fyrirtækið fyrir að stuðla að óheilbrigðum lífstíl. 

Frétt af mbl.is

Fyrrverandi lykilstarfsmaður hjólar í Facebook

• Blogga um frétt