Kópavogsbær útrýmir launamun kynjanna

mbl.is/Hjörtur

Launamunur kynja hjá Kópavogsbæ er enginn þegar bornir eru saman einstaklingar í sambærilegum störfum, á sama aldri, með sömu starfsreynslu og færni. Þetta kemur fram í nýrri launarannsókn sem Rannsóknamiðstöð Háskólans á Akureyri (RHA) vann fyrir Kópavogsbæ og kynnt var í morgun á fundi jafnréttis- og mannréttindaráðs.

Í fréttatilkynningu frá Kópavogsbæ segir að rannsóknin hafi verið unnin upp úr launabókhaldi Kópavogsbæjar á mánaðartímabili. Unnið var með launagögn allra starfsmanna í yfir 40% starfshlutfalli, alls 1.891 starfsmanns sem eru 80% allra starfsmanna Kópavogsbæjar.

Niðurstaðan er sú að þegar leiðrétt hefur verið fyrir áhrifaþáttum á laun; aldri, starfsaldri, menntun, sviði og vinnutíma, er ekki marktækur munur á launum kynja. Síðast þegar sambærileg rannsókn var gerð var kynbundinn launamunur 3,25% körlum í vil.

Konur eru í miklum meirihluta starfsmanna Kópavogsbæjar, eða um 80%. Kynin dreifast ekki jafnt, hvorki eftir sviðum né starfi. Hlutfallslega fleiri karlar hjá Kópavogsbæ vinna í tekjuhæstu starfsgreinunum og karlar vinna að meðaltali fleiri yfirvinnutíma en konur sem hefur áhrif á heildarlaun þeirra. Meðallaun karla eru 18% hærri en meðallaun kvenna, áður en tekið er tillit til áhrifaþátta sem áður hefur verið getið um.

mbl.is
Svæði

Gagnaveitur

Erlendar viðskiptafréttir