Telur sjóðina of stóra

Samkeppniseftirlitið setur alvarlega fyrirvara við samruna Haga og Olís annars vegar og N1 og Festis hins vegar. Ein helsta ástæðan fyrir því er að frumniðurstöður rannsóknar stofnunarinnar á fyrirhuguðum samrunum munu tengjast víðtæku eignarhaldi íslenskra lífeyrissjóða á fyrirtækjunum.

Fram kemur í Morgunblaðinu í dag, að Samkeppniseftirlitið hefur sent út andmælaskjal vegna fyrrnefndra samruna sem komnir eru til vegna harðnandi samkeppni á smásölumarkaði, ekki síst eftir tilkomu Costco á íslenskan markað.

Í andmælaskjalinu kemur fram að samrunarnir verði að öllu óbreyttu ekki heimilaðir. Verði niðurstaðan sú í báðum tilvikum yrði það ekki í fyrsta sinn sem Samkeppniseftirlitið stígur inn í samrunatilraunir sem tengjast komu Costco á markaðinn.