Ferðaþjónusta nær þrefalt stærri en sjávarútvegur

Útflutningsverðmæti ferðaþjónustu er orðið tæplega þrefalt meira en útflutningsverðmæti sjávarafurða og lætur nærri að það hafi reynst helmingi meira en samanlagt útflutningsverðmæti sjávarafurða og áls. 

Þetta kemur fram í Hagsjá hagfræðideildar Landsbankans. Þar segir að útflutningur ferðaþjónustu hafi aukist töluvert á síðasta ári á sama tíma og útflutningsverðmæti sjávarafurða hafi dregist saman. 

Útflutningur ferðaþjónustu nam 504 milljörðum króna og jókst um 41 milljarða á milli ára, eða um 8,9%. Ef ekki hefði komið til aukning í útflutningi ferðaþjónustu hefði útflutningur þjónustu dregist saman um 15 milljarða króna, eða 2,3%. Útflutningsverðmæti sjávarafurða nam 183 milljörðum króna og útflutningsverðmæti áls 184 milljörðum króna. 

Útgjöld vegna ferðalaga Íslendinga námu 176,5 milljörðum á síðasta ári og jukust um 24,5 milljarða á milli ára, eða 16,1%. Hagfræðideild Landsbankans segir að skýra megi það að hluta til með styrkingu krónunnar sem hefur aukið kaupmátt íslenskra heimila erlendis. Einnig hafi efnahagslegur uppgangur hér á landi og aukinn kaupmáttur mikið að segja. 

• Blogga um frétt