Bjarnheiður Hallsdóttir, framkvæmdastjóri Kötlu DMI ehf., var kjörin formaður Samtaka ferðþjónustunnar á aðalfundin samtakanna í dag.
Þetta staðfestir Skapti Örn Ólafsson, upplýsingafulltrúi Samtaka ferðaþjónustunnar, í samtali við mbl.is. Grímur Sæmundsen hefur gegnt formennsku undanfarin fjögur ár en hann tilkynnti um miðjan febrúar að hann ætlaði ekki að gefa kost á sér á aðalfundi.
Bjarnheiður Hallsdóttir, Þórir Garðarsson, Margeir Vilhjálmsson og Róbert Guðfinnsson sóttust eftir formennskunni en Róbert dró framboð sitt til baka. Niðurstaðan í formannskjörinu í dag var sú að Bjarnheiður fékk 44,72% atkvæða, Þórir 44,62% og Margeir 10,65%.
Bjarnheiður Hallsdóttir er framkvæmdastjóri ferðaskrifstofunnar Kötlu DMI. Bjarnheiður var stundakennari við Háskóla Íslands og eins við Ferðamálaskóla Kópavogs auk þess að halda hina ýmsu fyrirlestra varðandi ferðaþjónustu. Hún er einnig í forystu þess fólks á Skaganum sem hefur hrundið af stað undirskriftasöfnun og öðrum aðgerðum sem mynda eiga þrýsting á stjórnvöld að fara í úrbætur á Vesturlandsvegi á Kjalarnesi.
Í stjórn samtakanna voru kjörin þau Halldóra Gyða Matthíasdóttir Proppé, rekstrarstjóri sölu- og markaðssviðs Kynnisferða, Ívar Ingimarsson, stofnandi og framkvæmdastjóri ferðaþjónustunnar Óseyri, Jakob Einar Jakobsson, framkvæmdastjóri Jómfrúarinnar og Ólöf R. Einarsdóttir, eigandi Mountaineers of Iceland.
Ingibjörg Ólafsdóttir, hótelstjóri Radisson Blu Hótels Sögu, og Pétur Þ. Óskarsson, framkvæmdastjóri Samskiptasviðs Icelandair Group, sitja nú þegar í stjórn SAF, en þau voru kjörin til tveggja ára á aðalfundi samtakanna árið 2017.