Fyrsta A330-900neo-breiðþotan af þeim fjórum sem flugfélagið WOW air fær afhentar á árinu er komin úr málun hjá flugvélaframleiðandanum Airbus.
WOW air verður annað flugfélagið í heiminum til að taka á móti slíkum breiðþotum sem eru stærri og langdrægari en aðrar flugvélar í íslenska flotanum. Þetta er nýjasta afurð Airbus framleiðslunnar en viðhengið „NEO“ stendur fyrir „New Engine Option“ sem þýðir ný tegund hreyfla sem minnkar eldsneytisnotkun um 14% miðað við núverandi tækni. Vélarnar fjórar eru leigðar til tólf ára frá CIT Aerospace International.
Langdrægni Airbus A330-900neo véla er 9.750 km, eða sem nemur vegalengdinni til Hong Kong eða Honolulu frá Keflavíkurflugvelli. Listaverð hverrar vélar er 291 milljónir bandaríkjadala. Í vélunum verða 365 sæti þar af 42 sæti sem eru stærri, breiðari og með auknu sætabili.
Flugfloti WOW air verður 24 þotur í lok árs en auk breiðþotanna tekur félagið tekur félagið á móti þremur nýjum þotum á árinu; tveimur Airbus A321ceo og einni Airbus A321neo. Þoturnar sjö koma beint frá verksmiðjum Airbus í Evrópu.
Á Facebook-síðu Airbus er greint frá málun breiðþotunnar.