Viðskipti | mbl | 30.4.2018 | 18:12 | Uppfært 22:20

Auknar tekjur og hærra tap

Forstjóri félagsins segir afkomuna vera í takt við áætlanir. mbl.is/Júlíus Sigurjónsson

Heildartekjur Icelandair group jukust um 21% á fyrsta ársfjórðungi þessa árs miðað við sama tíma í fyrra. Útgjöld jukust þó einnig talsvert og var afkoma ársfjórðungsins lakari en á sama tíma í fyrra.

Í tilkynningu til Kauphallarinnar er haft eftir Björgólfi Jóhannssyni, forstjóra félagsins, að afkoman sé í takt við áætlanir. Er yfirskrift tilkynningarinnar „Ár breytinga,“ en félagið hefur undanfarið farið í gegnum miklar skipulagsbreytingar.

Heildartekjur félagsins voru 267,6 milljón dalir á fyrsta ársfjórðungi í ár, en voru 222,1 milljón árið áður. EBITDA-afkoma var neikvæð um 18,2 milljónir dala og lækkaði um rúmlega 8,2 milljónir dala. Heildartap tímabilsins var 34,5 milljónir dala á móti 29,9 milljónum í fyrra.

Icelandair flutti svipað marga farþega á fyrsta ársfjórðungi í ár og í fyrra. Voru þeir 659 þúsund og fjölgaði um 0,3%. Sætanýting fór niður úr 77,4% í 76,3%. Hjá Air Iceland connect var farþegafjöldinn ívið betri en í fyrra og hækkaði úr 71,5 þúsund í 72,4 þúsund, en sætanýting lækkaði hins vegar úr 63,9% í 60%. Fraktflutningar jukust hins vegar um 23%.

Fyrirtækið bendir á að samanburðartölur frá árinu 2017 séu um 0,2% hærri en áður hafi komið fram í birtum farþegatölum. Skýrist það af innleiðingu á nýju tekjubókhaldskerfi í fyrra og hafi villa fundist við yfirfærslu gagna sem hafi leitt af sér skekkju.

Seldum gistinóttum hjá hótelum fyrirtækisins fækkaði um 5% á tímabilinu, en þegar tekið er tillit til þess að framboðnum gistinóttum fækkaði einnig örlítið var lækkun á herbergjanýtingu 2,7%.

Laun og annar starfsmannakostnaður hækkaði um 31% á tímabilinu, en helsta skýring þess er gengisáhrif. Stafar það af því að uppgjör félagsins er í dollurum, en nær allur launakostnaður er í íslenskum krónum og hefur gengisþróun undanfarið verið félaginu óhagstæð. Þá fjölgaði stöðugildum Icelandair vegna vaxtar félagsins og vegna þess að verið er að taka í notkun nýja flugvélategund, Boeing 737 MAX, og kallar það á fleiri áhafnir í þjálfun á meðan á undirbúningstíma stendur. Þá ákvað félagið að nýta frekar eigin starfsmenn í stað þess að kaupa þjónustu af þriðja aðila og hefur stöðugildum á viðhaldssviði félagsins fjölgað um 42 milli ára. Lækkar því aðkeypt þjónusta en laun lækka. Þá hefur eldsneytiskostnaður hækkað um 31% milli ára hjá félaginu, en það skýrist af hækkandi heimsmarkaðsverði.