MS skrifaði í dag undir framleiðslu- og vörumerkjasamning á Ísey-skyri við Nippon Luna, mjólkurvörufyrirtæki í eigu Nippon Ham, sem er eitt stærsta fyrirtæki Japans á sviði ferskra og frosinna matvæla og jafnframt fjórði stærsti kjötframleiðandi heims.
Í fréttatilkynningu frá MS segir að markaðurinn fyrir jógúrtvörur í Japan sé sá næststærsti í heiminum á eftir Bandaríkjunum og velti um 5 milljörðum Bandaríkjadala á ári. Reist verður ný verksmiðja fyrir framleiðslu á Ísey-skyri í Japan og mun sala hefjast strax í ársbyrjun 2019.
„Með hliðsjón af því og styrk viðsemjandans er þetta stærsti samningur sem MS hefur gert um framleiðslu á Ísey skyri,“ segir í tilkynningunni.
Samningurinn var undirritaður í höfuðstöðvum Nippon Ham í dag af forstjórum Nippon Luna og MS. Guðlaugur Þór Þórðarson, utanríkisráðherra Íslands, Elín Flygenring, sendiherra Íslands í Japan, og Bolli Thoroddsen, forstjóri Takanawa, sem kom að gerð samningsins með MS, voru viðstödd undirritunina.