Samlagsfélagið Ordabok.is var tekið til gjaldþrotaskipta um miðjan maí, að því er kemur fram í auglýsingu í Lögbirtingarblaðinu. Eins og nafnið gefur til kynna heldur félagið utan um vefsíðuna Ordabok.is sem hefur að geyma rafrænar orðabækur.
Vefurinn var gangsettur í október 2001 og hafði þá að geyma ensk-íslenska og íslensk-enska orðabók. Á síðustu árum hafa bæst við dönsk-íslensk og íslensk-dönsk orðabók, ásamt stafsetningarorðabók.
Vefsíðan er enn opin en ekki náðist í umsjónarmann hennar við gerð fréttarinnar.