Hlutabréfaverð Icelandair hélt áfram að hækka nú í morgun eftir opnun markaða. Hefur það hækkað um 5,1% það sem af er degi í 289 milljón króna viðskiptum.
Bréf í félaginu hækkuðu einnig mikið í gær, en þá fóru þau upp um tæplega 10%. Helsti samkeppnisaðili Icelandair, flugfélagið WOW air, hefur undanfarna daga og vikur unnið að því að tryggja sér fjármögnun með hlutafjárútboði, en félagið þarf að lágmarki að tryggja sér 50 milljónir dali, eða sem nemur 5,6 milljörðum íslenskra króna.
Óvissa um skuldafjárútboðið er talin ein skýringin á snörpum hækkunum á verði hlutabréfa Icelandair. Þá hefur gengi íslensku krónunnar gefið eftir síðustu daga gagnvart helstu viðskiptamyntum. Seðlabankinn greip í gær inn í á gjaldeyrismarkaði vegna lækkunar krónunnar, en krónan hefur haldið áfram að lækka í dag og hefur gengisvísitalan hækkað um 0,5% það sem af er degi.
Greiningaraðilar segja í samtali við Morgunblaðið og mbl.is að líklega megi rekja þá þróun til ótta markaðarins við að ferðamönnum muni fækka á komandi mánuðum. Þar spili ekki síst inn í óljósar fréttir af stöðu WOW air.
Greint var frá því í Morgunblaðinu í dag að forsvarsmenn WOW air væru vongóðir um að geta tryggt félaginu aukið fjármagn og í Fréttablaðinu kom fram að stjórnendur WOW air hefðu fundað með fulltrúum viðskiptabankanna þriggja í gær og að skoðuð væri hugsanleg aðkoma þeirra að útboðinu. Þá segir blaðið jafnframt að Skúli Mogensen, forstjóri og eigandi WOW air, hafi ásamt lögmanni félagsins fundað með Samkeppniseftirlitinu síðla gærdags.