Umbreyting kaupir Borgarplast og Plastgerð Suðurnesja

Eftir kaupin mun Umbreyting eiga 78% í sameinuðu fyrirtæki en ...
Eftir kaupin mun Umbreyting eiga 78% í sameinuðu fyrirtæki en aðrir hluthafar verða Haukur Skúlason og Sigurgeir Rúnar Jóhannsson auk þess sem núverandi eigendur Plastgerðar Suðurnesja munu áfram verða í hluthafahópnum. Ljósmynd/Aðsend

Framtakssjóðurinn Umbreyting hefur fest kaup á fyrirtækjunum Borgarplasti hf. og Plastgerð Suðurnesja ehf.

Eftir kaupin mun Umbreyting eiga 78% í sameinuðu fyrirtæki en aðrir hluthafar verða Haukur Skúlason, sem verður framkvæmdastjóri og Sigurgeir Rúnar Jóhannsson auk þess sem núverandi eigendur Plastgerðar Suðurnesja munu áfram verða í hluthafahópnum. Arion banki var ráðgjafi kaupanda, að því er segir í tilkynningu.

Stærstu hluthafar Borgarplasts hf. voru Sjöfn Guðmundsdóttir og Guðni Þórðarson og hafa þau stýrt félaginu síðustu áratugi. Ráðgjafi seljanda Borgarplasts var Deloitte.

Borgarplast er leiðandi í hverfismótaframleiðslu fyrir innanlandsmarkað og bæði félögin framleiða vörur úr frauði, húsaeinangrun og frauðkassa til útflutnings á ferskum fiskafurðum og öðrum matvælum. 

Fram kemur í tilkynningunni að Icora Partners sé rekstraraðili Umbreytingar slhf. sem sé sjö milljarða kr. framtakssjóður sem hóf starfsemi árið 2018.

„Markmið Umbreytingar er að vera öflugur bakhjarl fyrirtækja og stjórnenda þeirra. Áhersla verður lögð á að fjárfesta í fyrirtækjum sem búa yfir góðu og sannreyndu viðskiptamódeli og að stjórnendur hafi árangursmiðað hugarfar. Stefna Umbreytingar er að skila fyrirtækjum af sér í betra ástandi en þegar þau voru keypt og þannig skilja eftir sig jákvæð fótspor í íslensku atvinnulífi,“ segir í tilkynningunni.

„Verkefnið er krefjandi og felur í sér umbreytingu á rekstri og efnahag sameinaðs félags. Félögin eru hins vegar rótgróin og rekstur þeirra traustur. Við hlökkum til samstarfsins við nýja lykilstjórnendur og meðeigendur okkar og munum styðja félagið til frekari vaxtar,” er haft eftir Gunnari Páli Tryggvasyni, framkvæmdarstjóri Icora Partners.

„Verkefnið er spennandi og sjáum við mörg tækifæri til að sinna viðskiptavinum betur, nýjum og núverandi. Við munum sameina rekstur félaganna fljótlega og styrkja þau til vaxtar, innanlands og erlendis, auk þess sem við munum fjárfesta í nýjum vélum og búnaði og ná þannig fram frekari hagræðingu í framleiðslu. Ég hlakka til að vinna með Icora Partners á þessari vegferð. Ég held að ekki hafi getað fengist betri samstarfsaðili í verkefnið en undirbúningur viðskiptanna hefur sýnt mér að Umbreyting sker sig úr öðrum innlendum sjóðum við nálgun framtaksverkefna,“ segir Haukur Skúlason framkvæmdastjóri í tilkynningu.

mbl.is

Gagnaveitur

Erlendar viðskiptafréttir