Reykjavík þriðja dýrasta borg Evrópu

Erna Björg Sverrisdóttir, sérfræðingur greiningardeildar Arion banka, sagði á morgunfundi deildarinnar í morgun, um ferðaiðnaðinn hér á landi, að Reykjavík væri orðin þriðja dýrasta borg í Evrópu fyrir hinn hefðbundna ferðamann. Vísaði Erna þar í hina svokölluðu þriggja stjörnu vísitölu, þ.e. hvað hinn hefðbundni ferðamaður greiðir fyrir hótel, leigubíl, heimsókn á safn, máltíð og bjór að loknum góðum degi.

Frétt af mbl.is

Airbnb-eignum tekið að fækka

Einu borgirnar sem skáka Reykjavík í þessum samanburði eru Zürich, sem er dýrust, og Interlaken, sem er næstdýrust, en báðar þær borgir eru í Sviss.

Sagði Erna að eftir því sem raungengi íslensku krónunnar hækki, því dýrara verði fyrir ferðamanninn að vera í landinu. Það sem vegur á móti aukinni dýrtíð er hins vegar sú staðreynd að flugfargjöld hafi lækkað.

Eitt af því sem gerst hefur á síðustu árum er að eftir því sem landið verður dýrara og dýrara, hafi ferðamenn brugðist við með því að færa sig í ódýrari gistingu. Á því er þó mögulega að verða breyting.

Frétt af mbl.is

Spá mjög lítilli fjölgun ferðamanna

Ferðamenn á Þingvöllum. mbl.is/Eggert Jóhannesson

Komið að kaflaskilum

Erna ræddi einnig um skráðar gistinætur, en samkvæmt þeim er enn að verða meiri samþjöppun í gistingu ferðamanna á suðvesturhorninu, sem er þvert á vonir um að ná að dreifa ferðamönnum betur út um landið.

Lauk Erna máli sínu á því að segja að Ísland væri að koma að kaflaskilum í ferðaiðnaðinum, hægt hafi á vextinum, og því þurfi að huga að því hvernig hægt væri að fá meiri tekjur út úr þeim ferðamönnum sem koma til landsins.

• Blogga um frétt