„Það þarf að vera eitthvað skemmtilegt um að vera í búðinni, uppákomur, spilakvöld, fyrirlestrar. Það þarf að vera upplifun,“ segir Gísli Einarsson, eigandi Nexus, sem í enn eitt skiptið er að stækka og opnar í gamla Útilífsplássinu í Glæsibæ um helgina. Slíkt eigi netið erfitt að keppa við.
Ég kom við í Glæsibæ þar sem fjöldi fólks keppist nú við að gera verslunina tilbúna fyrir opnunina. Einungis fimm ár eru síðan Nexus opnaði í Nóatúni og hafði þá stækkað mikið. Verslunarplássið í Glæsibæ er um 600 fermetrar en auk þess verður 500 fermetra spilasalur þar sem viðskiptavinir koma saman og spila.