Hagnaður Ryanair dregst saman

Hagnaður írska flugfélagsins Ryanair dróst saman um 7% á fyrri hluta rekstrarársins sem lauk í lok september. Nam hagnaðurinn 1,2 milljörðum evra. Tímabilið hefur einkennst af verkföllum og aðgerðum flugmanna og annarra í áhöfnum félagsins. 

Í tilkynningu kemur fram að áfram sé gert ráð fyrir að hagnaðurinn verði 1,1-1,2 milljarðar evra á rekstrarárinu sem lýkur í lok mars. Það er 12% minni hagnaður en árið á undan. Skýringin er aðallega verkföll áhafna en aflýsa hefur þurft hundruðum flugferða Ryanair vegna þeirra. Jafnframt hefur verðhækkun á eldsneyti haft áhrif og kostnaður vegna EU261 en þar vísar Ryanair til reglugerðar ESB sem kveður á um greiðslu skaðabóta til flugfarþega vegna seinkana á flugferðum og þegar flugferðum er aflýst. 

Tekjur Ryanair hafa aftur á móti aukist um 27% á fyrri hluta rekstrarársins. Forstjóri Ryanair, Michael O'Leary, segir sumarið hafa verið mjög erfitt rekstrarlega séð ekki síst vegna verkfalla flugumferðarstjóra. Helsta skýringin á auknum tekjum eru breyttar reglur hjá Ryanair sem krefja farþega um greiðslu aukagjalds vilji þeir taka handfarangur sinn um borð ef taskan er stærri en handtaska. 

• Blogga um frétt