Átök um stjórnina

Allt stefnir í hörð átök á hluthafafundi í tryggingafélaginu VÍS 14. desember. Til fundarins er boðað til að kjósa nýja stjórn í félaginu.

Það er gert að kröfu tveggja af fjórum stærstu hluthöfum félagsins, Lífeyrissjóðs verslunarmanna og Lífeyrissjóðs starfsmanna ríkisins, að því er fram kemur í ViðskiptaMogganum í dag.

Hermt er að sjóðirnir freisti þess með stuðningi annarra stórra hluthafa að ná tveimur til þremur nýjum stjórnarmönnum og stilla í kjölfarið til friðar í félaginu. Mikill styr hefur staðið um VÍS um nokkurt skeið. Stutt er síðan tveir sögðu sig úr stjórninni vegna ágreinings við meirihluta stjórnar.