Innbrot í gagnagrunn Marriott International-hótelkeðjunnar náði til gagna um 500 milljónir viðskiptavina. Meðal gagnagrunna sem urðu fyrir barðinu á tölvuþrjótunum var bókunarkerfi stórs hluta keðjunnar. Í ljós hefur komið að þjófurinn eða þjófarnir hafa komist inn í þann grunn allt frá árinu 2014.
Upp komst um málið er öryggistæki sem er innbyggt í gagnagrunna Marriott-keðjunnar lét vita að einhver væri að reyna að komast inn í bókunarkerfið. Í ljós kom að einhver hafði í óleyfi farið inn í gagnagrunninn og tekið þar afrit af upplýsingum.
Í frétt BBC um málið segir að gögnin sem þrjótarnir komust yfir innihaldi m.a. upplýsingar, að hluta eða í heild, um nafn, heimilisfang, símanúmer, netfang, vegabréfsnúmer, reikningsupplýsingar, fæðingardag, kyn og fleira.
Marriott hefur komið upp vefsíðu þar sem viðskiptavinir geta nálgast upplýsingar um málið.