Gæti liðast í sundur á þessu ári

Vaxandi óstöðugleiki innan evrusvæðisins gæti leitt til þess að það liðist í sundur á þessu ári að mati bresku hugveitunnar Centre for Economic and Business Research (CEBR).

Þetta er meðal þess sem fram kemur í spá CEBR fyrir árið 2019 en hugveitan er ein sú virtasta á sviði efnahagsmála samkvæmt frétt breska dagblaðsins Daily Telegraph.

Ennfremur segir í spánni að ólíkar aðstæður innan evrusvæðisins muni annað hvort leiða til efnahagslegs samruna innan svæðisins eða til þess að það liðist í sundur.

Þá segir CEBR að hugsanlega væri hægt að fresta vandanum um eitt eða tvö ár en taka þyrfti á honum fyrr en síðar. Er þar ekki síst vísað til stöðu mála á Ítalíu.

Stjórnvöld á Ítalíu hafa deilt við Evrópusambandið um ríkisfjármál landsins en sambandið neitaði að leggja blessun sína yfir síðasta fjárlagafrumvarp ríkisstjórnarinnar.

Ráðamenn á Ítalíu létu loks undan og gerðu breytingar á frumvarpinu samkvæmt vilja Evrópusambandsins en deilan snerist einkum um mikinn fjárlagahalla ríkissjóðs.

• 2 blogg um fréttina

Bloggað um fréttina

• Jóhann Elíasson: FYRST HRYNUR EVRAN SVO FELLUR ESB Í KJÖLFARIÐ....
• Ásgrímur Hartmannsson: Bjartir