Villandi auglýsingar lítilsvirðandi í garð keppinauta

Eiga auglýsingarnar það sammerkt að viðskiptavinur gengur um verslun, tekur ...
Eiga auglýsingarnar það sammerkt að viðskiptavinur gengur um verslun, tekur upp grænmeti eða ávöxt sem á stendur „Imported“, leggur upp að eyranu og þá heyrist ákveðin hljóð, s.s. að sturtað sé niður úr klósetti, hljóð í þungavinnuvélum og vélagný, finni ólykt svo dæmi sé tekið. mbl.is/Árni Sæberg

Neytendastofa hefur bannað villandi samanburðarauglýsingar sem Sölufélag Garðyrkjumanna hefur staðið að til að vekja athygli á innlendu grænmeti og ávöxtum. Neytendastofa segir að í auglýsingunum sé verið að gefa í skyn að aðstæður við ræktun, hreinlætis og gæða innflutts grænmetis og ávaxta væri ábótavant.

Fram kemur á vef Neytendstofu, að erindi hafi borist Innnes ehf. þar sem kvartað hafi verið yfir auglýsingaherferð Sölufélagsins á innlendu grænmeti og ávöxtum.

„Eiga auglýsingarnar það sammerkt að viðskiptavinur gengur um verslun, tekur upp grænmeti eða ávöxt sem á stendur „Imported“ (ísl. innflutt), leggur upp að eyranu og þá heyrist ákveðin hljóð, s.s. að sturtað sé niður úr klósetti, hljóð í þungavinnuvélum og vélagný, finni ólykt svo dæmi sé tekið. Þegar sá hinn sami taki hins vegar upp vörur Sölufélags garðyrkjumanna heyrist hins vegar falleg tónlist eða brosandi veifandi bóndi og lesinn upp eftirfarandi texti.: „Grænmeti sem ber merkið okkar er ræktað með hreinu íslensku vatni. Hvaða vatn fer í gegnum grænmetið þitt? Íslenskt grænmeti, þú veist hvaðan það kemur.“,“ segir á vef Neytendastofu. 

Fram kemur, að Neytendastofa taldi að þrátt fyrir að ekki væri vísað með beinum hætti til Innnes eða annarra samkeppnisaðila Sölufélags garðyrkjumanna, að það væri augljóst að skírskotað væri til innflutts grænmetis og ávaxta og að gefið væri í skyn að aðstæður við ræktun, hreinlætis og gæða þess væri ábótavant.

Taldi Neytendastofa að auglýsingarnar fælu í sér villandi samanburð, væru neikvæðar og lítilsvirðandi í garð keppinauta á markaði og með þeim væri kastað rýrð á vörur Innnes. 

Eða eins og segir í ákvörðunni:

„Neytendastofa fellst ekki á þá skýringu Sölufélags garðyrkjumanna að  tilgangur  umræddra auglýsinga sé einvörðungu sá að upplýsa neytendur um gæði og ferskleika íslenskra afurða. Telur Neytendastofa að með samanburðarauglýsingunum sé gefið til kynna að innflutt grænmeti sé ræktað við mengandi og óásættanlegar aðstæður og hreinlætis jafnvel ekki gætt, ólíkt því ef íslensk framleiðsla félagsins verði fyrir valinu. Hvergi er að finna frekari skýringar um  það á hverju framangreint er byggt. Í auglýsingunum er ekki að finna neinar hlutlægar upplýsingar sem renna stoðum undir hinar umdeildu fullyrðingar, til að mynda með stjörnumerkingu eða á annan skýran hátt. Þá er neytandinn ekki upplýstur um hvar eða hvernig hann geti staðreynt slíkar hlutlægar upplýsingar sem stutt gætu fullyrðinguna í auglýsingunum. Að mati Neytendastofu eru auglýsingarnar neikvæðar og lítilsvirðandi í garð  keppinauta á markaði. Þrátt fyrir að málsgögn Sölufélags garðyrkjumanna bendi til þess að gæði, ferskleiki og aðbúnaður starfsfólks ræktunar kunni að vera ábótavant í einhverjum löndum þá er alhæfing þess efni einfaldlega ótæk.“

Neytendastofa bannaði Sölufélagi Garðyrkjumanna ehf. að viðhafa ofangreinda viðskiptahætti og beindi þeim fyrirmælum til fyrirtækisins að fjarlægja auglýsingarnar þaðan sem þeim hafði verið komið á framfæri.

mbl.is

Bloggað um fréttina

Myntbreyta

  ISK
  USD
  EUR
  GBP
  CAD
  DKK
  NOK
  SEK
  CHF
  JPY

Erlendar viðskiptafréttir