Segir tíma til greiðslu of nauman

Frá Vaðlaheiðargöngum.
Frá Vaðlaheiðargöngum. mbl.is/Þorgeir

Neytendasamtökin telja skilmála um greiðslu í Vaðlaheiðargöng ósanngjarna og andstæða góðum viðskiptavenjum. Kostnaður hækkar um 67%, sé ekki greitt innan þriggja klukkustunda frá því ekið er um göngin, eða úr 1.500 kr. í 2.500 kr. og fer þá greiðsluseðill í heimabanka umráðamanns ökutækisins.

Breki Karlsson, formaður Neytendasamtakanna, segir að þetta geti verið bagalegt fyrir þá sem ekki eigi snjallsíma. Samkvæmt hans upplýsingum eru það um 25% landsmanna.

Skjáskot/veggjald.is

„Þeir þurfa þá væntanlega að komast í heimatölvu,“ segir Breki og bendir á að tíminn sem gefinn er til greiðslu sé það naumur að sé ekið í gegnum göngin er aukagjaldið fallið á áður en komið er til Egilsstaða, nú eða Reykjavíkur sé ekið í hina áttina.

Vænta svars á morgun

„Við viljum að tíminn sé rýmkaður í tíu daga,“ segir Breki. Neytendasamtökin hafa sent forsvarsmönnum Vaðlaheiðarganga erindi þar sem þess er krafist og vænta svars á morgun. 

Hilmar Gunnlaugsson, stjórnarformaður Vaðlaheiðarganga, sagði í samtali við RÚV að honum hugnist ekki vel að lengja greiðslufrestinn vegna þess að það myndi skapa erfiðleika fyrir bílaleigur.

Breki Karlsson, formaður Neytendasamtakanna.
Breki Karlsson, formaður Neytendasamtakanna. mbl.is/Eggert Jóhannesson

„Það er ótækt að forsvarsmenn ganganna og bílaleigur komi sér ekki saman um einhverja leið. Þeir hljóta að geta fundið leið sem bitnar ekki á neytendum,“ segir Breki.

Vill að sjálfsafgreiðslukassar verði settir upp

Hann vill auk þess sjá að hægt sé að greiða á fleiri stöðum en á vefsíðu ganganna, www.veggjald.is.

„Auðvitað á að vera möguleiki fyrir þá sem aka þarna um að geta greitt á staðnum,“ segir Breki. Að hans mati ættu að vera tveir sjálfsafgreiðslukassar við göngin, einn hvoru megin.

„Það er ótækt að setja alla ábyrgð á greiðslunni á tækni sem ekki allir búa yfir og sem allir eru ekki klárir á að vinna með. Við væntum þess að þetta séu bara byrjunarörðugleikar og vonum að þeir virði góða viðskiptahætti.“

mbl.is

Bloggað um fréttina

Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK