„Hefðbundna bókin hlýtur að vera á niðurleið“

Heimkaup selja margt fleira en rafbækur. Guðmundur Magnason segir þær ...
Heimkaup selja margt fleira en rafbækur. Guðmundur Magnason segir þær vel til þess fallnar að ná til fleiri kúnna. mbl.is/Kristinn Magnússon

Mikil aukning er á sölu rafbóka hjá netversluninni Heimkaup.is en fyrirtækið hóf sókn á þann markað fyrir rúmum þremur árum. Það sem af er ári er söluaukning um 160% á rafbókum á milli ára og búast má við því að hátt í sjö þúsund rafbækur verði seldar hjá fyrirtækinu í ár en það einblínir á sölu rafbóka fyrir háskólanema. Þetta segir Guðmundur Magnason, framkvæmdastjóri Heimkaup.is, við Morgunblaðið.

Kynslóðaskipti í háskólum

„Söluaukningin er mjög sannfærandi og við teljum að hefðbundna bókin hljóti að vera á mikilli niðurleið á sama tíma hjá námsmönnum.“

Guðmundur segir margt spila inn í þessa þróun. Ein skýring er sú að ákveðin kynslóðaskipti séu að verða innan háskólans þar sem nemendur eru orðnir vanari því að lesa námsefni á rafrænu formi. Svo skiptir verðið miklu máli fyrir háskólanema.

„Verðmunurinn spilar líka inn í. Háskólabækur eru dýrari á prenti en þær eru ódýrari á þessu formi,“ segir Guðmundur sem segir að verðmunurinn sé um 15%-60%.

Hann segir að verðteygni háskólabóka sé afar mikil og augljóst að háskólanemendur velji ódýrari valkosti. Dæmi um slíkan valkost er að leigja bækur en algengt er að nemendur leigi bækur í 90-180 daga, eða sem nemur lengd námskeiðanna sem þeir taka. Er það nýjung sem vel hefur verið tekið.

Nánari umfjöllun er að finna í Morgunblaðinu í dag.

mbl.is

Gagnaveitur

Erlendar viðskiptafréttir