Flugfélagið WOW air hefur ekki greitt mótframlag í lífeyris- og séreignarsparnað frá því í október á síðasta ári, en greiðslur vegna nóvember-, desember- og janúarmánaðar eru nú komnar fram yfir eindaga. Gjalddagi vegna greiðslna febrúar er hins vegar enn ekki runninn upp.
Fyrst var greint frá þessu á Vísi í gærkvöldi.
Fréttablaðið greinir einnig frá þessu í dag og segir starfsmenn hafa verið fyrst látna vita af málinu í gær. Haft er eftir Svanhvíti Friðriksdóttur, upplýsingafulltrúa Wow air, í skriflegu svari að vegna „skammtíma lausafjárþrenginga flugfélagsins“ hafi WOW air orðið að fresta mótframlagsgreiðslum í lífeyris- og séreignarsparnað síðustu þrjá mánuði. Hlutur starfsmanna hafi þó verið greiddur að fullu.
WOW air hafi verið í góðum samskiptum við lífeyris- og séreignasjóði og gengið verði frá greiðslum í þessum mánuði.