Gengi hlutabréfa í Icelandair Group hækkaði afar skarpt strax á fyrstu mínútunum eftir að Kauphöll Íslands opnaði.
Gengi Icelandair hækkaði á fyrstu þremur mínútunum um rúmlega 26% og stóð verð hvers bréfs í 10,84 kr. um tíma en verðið nam 8,6 kr. við lokun markaðar í gær.
Hækkunin gekk nokkuð til baka í næstu viðskiptum og nemur hún nú 16,05%, og stendur gengið í 9,98 kr.
Hækkunina má vafalaust rekja til tíðinda af WOW Air en í gærkvöldi kom fram að bandaríska fjárfestingafélagið Indigo Partners hefði hætt við fjárfestingu sína í íslenska flugfélaginu. Í dag hófu fulltrúar Icelandair Group viðræður um mögulega aðkomu fyrirtækisins að rekstri WOW Air.
Í fréttatilkynningu Kauphallarinnar í morgun kom fram að að hlutabréf Icelandair hafi hlotið athugunarmerkingu með tilvísun í tilkynningu Icelandair Group hf. frá því í gærkvöldi þar sem tilkynnt var um fyrirhugaðar viðræður við WOW Air um aðkomu Icelandair að rekstri félagsins.
Segir enn fremur að athugunarmerking sé framkvæmd með vísan til ákvæðis 8.2 í reglum fyrir útgefendur fjármálagerninga.
„Kauphöllin getur ákveðið að athugunarmerkja fjármálagerninga viðkomandi útgefanda tímabundið ef aðstæður eru fyrir hendi sem leiða af sér umtalsverða óvissu varðandi útgefandann eða verðmyndun fjármálagerninganna,“ segir í fréttatilkynningu Kauphallarinnar.
Á miðvikudag hækkaði gengi Icelandair um 10,83% í kjölfar frétta af WOW Air þann daginn um að Skúli Mogensen, stofnandi og forstjóri WOW Air, hefði leitast eftir því að ríkissjóður Íslands veitti ríkisábyrgð fyrir láni sem fyrirtækið hugðist slá.
Í gær hækkaði gengi Icelandair um 7,77%.