Eimskip fækkar stöðugildum um 15

Samhliða skipulagsbreytingum hjá Eimskip á Íslandi, sem taka gildi um næstu mánaðarmót, verður stöðugildum hjá Eimskip og TVG-Zimsen fækkað um 15. Markmið breytinganna er að ná fram hagræðingu í rekstri, auka arðsemi og styrkja stoðir félagsins, segir í tilkynningu til Kauphallarinnar.

Í tilkynningunni segir að breytingarnar snúi að því að samþætta hluta stoðeininga félagsins í miðlægar einingar. Sem dæmi sameinast þrjár mismunandi akstursstýringardeildir í eina einingu.

Boðaðar eru talsverðar breytingar á starfsemi TVG-Zimsen, þar sem hluti stoðeininga þess sameinast sambærilegum einingum Eimskips. Einnig mun TVG-Zimsen flytja starfsemi sína yfir í Vöruhótelið síðar í sumar. TVG-Zimsen verður eftir sem áður rekið sem sjálfstætt dótturfyrirtæki Eimskips.

• Blogga um frétt