Síminn hagnaðist um 615 milljónir króna á fyrsta fjórðungi þessa árs samanborið við 887 milljónir á sama tímabili í fyrra.
Tekjur námu 6.962 milljónum króna samanborið við 6.874 milljónir króna á sama tímabili 2018 og hækka því um 88 milljónir króna eða 2,3%.
Rekstrarhagnaður fyrir afskriftir og fjármagnsliði EBITDA nam 2.369 milljónum króna. Hann var 2.404 milljónir króna á fyrsta fjórðungi ársins 2018 og lækkar því um 35 milljónir króna eða 1,5% á milli ára. EBITDA hlutfallið er 34,0% fyrir fyrsta ársfjórðung 2019 en var 35,0% á sama tímabili 2018.
Handbært fé frá rekstri án vaxta og skatta nam 2.062 milljónum króna en var 2.390 milljónir króna á sama tímabili 2018. Eftir vexti og skatta nam handbært fé frá rekstri 1.711 milljónum króna en 2.043 milljónum króna á sama tímabili 2018.
Í tilkynningu um ársfjórðungsuppgjörið er haft eftir Orra Haukssyni, forstjóra Símans, að tekjur hafi aukist mili ára og að mikilvægir tekjustraumar eins og sjónvarpsþjónusta verði enn sterkari þegar líður á árið.
Orri minnist enn fremur á að Síminn hafi áfrýjað dómi Héraðsdóms Reykjavíkur frá því í lok mars. Þar var Síminn dæmdur til að greiða fjarskiptafyrirtækinu TSC ehf. á Grundarfirði 50 milljónir króna með vöxtum og sex milljónir króna í málskostnað vegna samkeppnisbrota fyrrnefnda fyrirtækisins.