Sá ríkasti í Asíu kaupir Hamleys

Ríkasti maður Asíu, Mukesh Ambani, hefur keypt Hamleys-leikfangaverslunina í London á 88 milljónir Bandaríkjadala, tæpa 11 milljarða króna, af kínverska fyrirtækinu C. Banner International Holdings. Baug­ur keypti Ham­leys árið 2004 en leikfangaverslunin komst í eigu bankanna eftir hrun og fall Baugs.

Franska leik­fanga­versl­ana­keðjan Groupe Ludendo keypti Ham­leys af ís­lensku bönk­un­um árið 2012 og 2015 eignaðist kín­verski skófram­leiðand­inn C. Banner Ham­leys. Guðjón Reynisson var forstjóri Hamleys frá árinu 2008 til 2017.

Mukesh Ambani er nýr eigandi Hamleys. AFP

Fyrirtæki Ambanis, Reliance Brands, tilkynnti um kaupin seint í gærkvöldi en William Hamley opnaði fyrstu leik­fanga­versl­un­ina í London árið 1760 og er hún því 259 ára gömul. Í dag er Ham­leys að finna í mörg­um lönd­um, svo sem Kína, Rússlandi, Dubai og víðar.

Eignir Ambani eru metnar á 50 milljarða Bandaríkjadala samkvæmt Forbes-tímaritinu en hann hagnaðist fyrst á olíuvinnslu. Í dag spannar viðskiptaveldi hans breitt svið, allt frá tæknifyrirtækjum til raflagna. Undanfarin ár hefur hann keypt fjölda fyrirtækja í verslunarrekstri og má þar nefna Burberry, Canali, Paul Smith, Armani, Just Cavalli og Jimmy Choo.

Hann er einnig stór á indverskum netverslunarmarkaði og heyr þar harða baráttu við fyrirtæki eins og Amazon og Walmart. 

Þrátt fyrir að Hamleys-verslanir sé að finna víða um heim er verslunin í London alltaf helsta flaggskip fyrirtækisins en á hverju ári heimsækja um fimm milljónir verslunina. Rekstur Hamleys hefur aftur á móti verið erfiður og sést það sennilega best á því að C. Banner greiddi tæplega tvöfalt hærra verð fyrir Hamleys árið 2015 en félag Ambanis, Reliance Brands, greiðir fyrir Hamleys í dag.

• Blogga um frétt