Samkeppniseftirlitið ógildir samruna

Verslun Iceland í Engihjalla. Basko rekur m.a. verslanirnar Iceland og ...
Verslun Iceland í Engihjalla. Basko rekur m.a. verslanirnar Iceland og 10/11. Ljósmynd/Aðsend

Samkeppniseftirlitið hefur ógilt samruna sem var áformaður með kaupum Samkaupa hf. á tveimur verslunum Basko á Akureyri og í Reykjanesbæ.

Mat Samkeppniseftirlitsins er að kaupin hefðu raskað verulega samkeppni á þessum tilteknu landssvæðum, að því er segir í tilkynningu frá stofnuninni. Þannig hefði eiginlegum keppinautum fækkað úr þremur í tvo á Akureyri og úr fjórum í þrjá í Reykjanesbæ. Samruninn hefði verið neytendum til tjóns, að mati hennar.

Samkeppniseftirlitið lét framkvæma neytendakönnun við verslanir á þessum stöðum, til þess að meta samkeppni á viðkomandi svæðum.

Áður hefur Samkeppniseftirlitið heimilað kaup Samkaupa á eignum tólf verslana Basko. Það mál varðaði upphaflega 14 verslanir og gaf Samkeppniseftirlitið til kynna strax á fyrstu stigum máls að því sýndist að samruninn hefði ekki skaðleg áhrif á samkeppni á höfuðborgarsvæðinu, en líkur væru á því að samkeppni myndi skaðast á staðbundnum svæðum, þ.e. einkum á Suðurnesjum og á Akureyri.

Rannsókn málsins styrkti þetta mat eftirlitsins, að því er segir í tilkynningunni. „Afréðu samrunaaðilar þá að undanskilja verslanir á Akureyri og í Reykjanesbæ upphaflegum samningi. Á þeim grunni var Samkeppniseftirlitinu kleift að taka afstöðu til kaupa Samkaupa á 12 verslunum Basko, sbr. fyrrgreinda ákvörðun. Í framhaldinu tilkynntu samrunaaðilar að nýju kaup Samkaupa á útistandandi tveimur verslunum Basko. Þau kaup eru til umfjöllunar í máli þessu.“

Fram kemur að kaup Samkaupa á verslunum Basko á höfuðborgarsvæðinu hafi styrkt stöðu Samkaupa sem þriðja stærsta keppninautarins á dagvörumarkaði.

„Það má hins vegar ekki verða á kostnað neytenda í Reykjanesbæ og á Akureyri. Því var óhjákvæmilegt að ógilda samrunann að því leyti.“

mbl.is

Myntbreyta

  ISK
  USD
  EUR
  GBP
  CAD
  DKK
  NOK
  SEK
  CHF
  JPY

Erlendar viðskiptafréttir