Alvotech ætlar að ráða 100 starfsmenn

Lyfjafyrirtækið Alvotech leitar nú að 100 vísindamönnum og sérfræðingum til að taka þátt í uppbyggingu fyrirtækisins.

Hjá Alvotech starfa nú um 330 vísindamenn í hátæknisetri fyrirtækisins á Íslandi, í Sviss og í Þýskalandi af um 20 þjóðernum. Þau störf sem nú eru auglýst til umsóknar eru aðallega miðuð að einstaklingum með háskólamenntun á sviði líf-, raun- og lyfjavísinda eða verkfræði, segir í fréttatilkynningu.

Alvotech lauk nýlega 36 milljarða króna fjármögnum með erlendum fjárfestum og japanska lyfjafyrirtækið Fuji Pharma gerðist hluthafi í fyrirtækinu með sex milljarða króna fjárfestingu. Fyrirtækið er því vel fjármagnað og undirbúið fyrir áframhaldandi vöxt segir enn fremur í tilkynningu.

Alvotech vinnur að þróun og framleiðslu líftæknilyfja sem eru notuð til meðferðar á erfiðum sjúkdómum eins og t.d. og gigt, psoriasis og krabbameini.  Þróunar- og framleiðslusetur fyrirtækisins á Íslandi er búið fullkomnustu tækjum og búnaði og hefur fyrirtækið nú þegar fengið framleiðsluleyfi og gæðavottun. Hátæknisetrið er hluti af Vísindagörðum Háskóla Íslands í Vatnsmýrinni og er um 13 þúsund fermetrar að stærð.

Lyfjafyrirtækið Alvotech ætlar að ráða 100 vísindamenn til starfa.

• Blogga um frétt