Tólf sagt upp hjá Heklu

Tólf starfsmönnum Heklu hefur verið sagt upp störfum vegna hagræðingar innan bílaumboðsins. 

„Þessi markaður sem við störfum á hefur verið erfiður síðustu mánuði,“ segir Friðbert Friðbertsson, forstjóri Heklu, og bendir á að bílasala í landinu hafi dregist saman um yfir 30 prósent frá því á sama tíma í fyrra. Vísir greindi fyrst frá málinu. 

„Því miður eru ekki aðrir kostir í stöðunni þó að það sé erfitt að sjá á eftir góðu starfsfólki, fólki með reynslu og getu til þess að sinna sínum störfum en því miður er þetta staðan.“

Þeim sem sagt var upp hafa starfað á hinum ýmsu deildum fyrirtækisins.

Að sögn Friðberts eru flest fyrirtæki í landinu að leita leiða til að hagræða og takast á við þær aðstæður sem eru á markaðnum í dag. Hann segir óvissuna í kringum kjaraviðræður og gjaldþrot WOW air hafa haft sitt að segja varðandi dvínandi bílasölu.

Alls starfa um 140 manns hjá Heklu.

• Blogga um frétt