„Mér er efst í huga tilhlökkun,“ sagði Már Guðmundsson seðlabankastjóri er hann var spurður hvað honum væri efst í huga í ljósi þess að þetta hafi verið síðasta vaxtaákvörðun sem hann kemur að áður en hann lætur af störfum.
Undir lok kynningarfundar Seðlabanka Íslands í dag vegna ákvörðun peningastefnunefndar um að lækka stýrivexti um 0,25 prósentustig, rifjaði Már upp breytingar sem hafa átt sér stað frá því hann í fyrsta sinn tók þátt í að tilkynna vaxtaákvörðun þann 24. september 2009.
„Þá var ákveðið að halda vöxtum bankans óbreyttum í tólf prósentum og núna eru þeir 3,75%. Þá var verðbólgan mæld 11% og nú var hún mæld síðast 3,3%. Skráð atvinnuleysi var 8,5% og á leiðinni upp, nú er það 3,7%. Langtímavextir voru rúm 8% óverðtryggðir […] en þeir eru núna tæp 4%,“ sagði seðlabankastjóri.
„Ég held að það sé óhætt að segja að þrátt fyrir allt hafi náðst töluverður árangur á þessum tíma,“ bætti hann við.
Þá sagði hann að á starfstímanum hafi þessir kynningarfundir batnað mikið og að þeir væru mikilvægur þáttur í starfi Seðlabankans. Jafnframt hafi fjölmiðlar sinnt hlutverki sínu vel og spurt erfiðra spurninga þegar tilefni hafi verið til.