Útlit er fyrir að afkoma VÍS verði rúmum 600 milljónum hagstæðari en afkomuspá félagsins gerði ráð fyrir. Þetta kemur fram í tilkynningu frá félaginu sem birt var á vef Kauphallarinnar í kvöld.
Þar segir að drög að árshlutauppgjöri bendi til þess að hagnaður félagsins á öðrum ársfjórðungi fyrir skatta verði á bilinu 1.400-1.450 milljónir króna, en afkomuspá félagsins gerði ráð fyrir hagnaði fyrir skatta upp á 814 milljónir króna á tímabilinu.
Er helsta ástæða betri afkomu sögð vera hærri ávöxtun fjáreigna á tímabilinu.
Miðað við fyrirliggjandi forsendur áætlar félagið að hagnaður ársins 2019 fyrir skatta verði um 3.300 milljónir króna.
Félagið tilkynnir að öðru óbreyttu sérstaklega ef frávik frá væntum hagnaði ársins 2019 fyrir skatta er umfram 10%.