Bjóða bílafjármögnun á kjörum sem hvergi finnast á markaði

Bílaumboðið BL mun nú bjóða viðskiptavinum sínum bílafjármögnun sem er um helmingi ódýrari en hagstæðustu bílalán á markaðnum í dag. Viðskiptavinum stendur frá og með morgundeginum til boða að taka lán á föstum 3,95% óverðtryggðum vöxtum þegar keyptar eru bifreiðar frá umboðinu.

Að sögn Brynjars Elefsen Óskarssonar, framkvæmdastjóra sölusviðs, er verkefnið unnið í samstarfi við Lykil fjármögnun. „Til að byrja með verður þetta í boði fyrir alla nýja bíla hjá okkur. Þetta er afar skynsamleg og örugg fjármögnun, en lauslega á litið munar um 50% á okkar lánum og því sem best býðst á markaðnum. Þetta eru einnig vextir sem standa töluvert neðar en húsnæðislánavextir,“ segir Brynjar en til samanburðar má nefna að hagstæðustu föstu vextir óverðtryggðra húsnæðislána eru 5,14% og standa til boða hjá Lífeyrissjóði verzlunarmanna.

Viðskiptavinir BL þurfa engin lántökugjöld að greiða þegar tekin eru lán vegna bifreiðakaupa hjá umboðinu. Þess utan er ekkert hámark á lánum til viðskiptavina, en lánstíminn fer þó eftir því hversu mikið eigið fé viðskiptavinurinn getur lagt fram. Mest verða veitt 90% lán og eru þau til þriggja ára. Eiginfjárkrafan eykst jafnt og þétt eftir því sem lánstíminn lengist, en lánin eru lengst veitt til sjö ára.

Lánin geti breyst í framtíðinni

Brynjar segir að lánin séu komin til að vera þótt þau muni hugsanlega standa til boða á öðru formi í framtíðinni. „Það kunna að vera aðrar vaxtaprósentur og þess háttar. Mögulega verða lægri vextir síðar meir í einhverjum tilvikum. Þetta er allt í skoðun ,“ segir Brynjar í umfjöllun um lánakjör þessi í ViðskiptaMogganum í dag.